市場熱線：中化肥穩步上揚

祖國喺3點4左右突然加RRR，港股即刻由升轉跌，阿爺做嘢真係估佢唔到，過往郁手都係長假日子，而時間多數係黃昏happy hour，今次揀三點幾，好多股友都唔知發生乜事，當然嗰段時間A股已經收市；港股要睇住大陸，但大陸冇話要睇住香港喎！另一古勝估唔到嘅係加RRR而非加息，好多工廠已借唔到錢要執笠，但人行一樣唔手軟，放鬆宏調只係班好友一廂情願嘅想法。

民企頭頭碰着黑

民企借錢已經愈來愈艱難，民企帳目有懷疑嘅風氣已由美國傳到落香港，玖紙（02689）下晝突然急跌17%之後拉閘，原來標普搵唔到公司管理層解畫，所以撤回公司嘅債務評級，依家孖屐已到杯弓蛇影嘅地步，搞到保利協鑫（03800）同秦發（00866）都要延遲發債計劃，對民企長遠發展相當不利。

阿爺喺統計局捉到幾個「內奸」，話要防止國家機密外洩，但尋日公布嘅CPI又係準到冇朋友，同外界預測嘅5.5%一模一樣。明眼人都知係特登通水，有個好處係等孖屐有晒心理準備，當10點鐘數據公布冇「爆冷」之後，港股同A股即刻拿拿臨上升，完全冇驚過加息，因為頂多預佢加多一、兩次。

聽日隻「喼神」（01910）就上市，雖然孖屐氣氛略好轉，但首日股價表現都唔敢樂觀。呢排好多公司減價到單位數PE招股一樣唔掂，好似遠大（02789）同正業（03363）都要潛水，周四、五共有4隻新股弱市招股，肯定要爭崩頭，興源（01156）同雙樺（01241）係冷門工業股好難有得發圍，浩沙（02200）做泳衣都值20倍PE？中國光纖網絡（03777）聽個名有較大想像空間，但實際唔知做乜，今明年PE得7.8倍同6.1倍，平嘢冇好？

鉀肥價格續看漲

古勝上個月推介過中海石化（03983），雖然都係要跌，但相對其他二三線股表現唔算差，另一隻肥田料股中化肥（00297）亦幾平穩，成個月波幅都係一成左右，祖國鉀肥超過一半要靠入口，所以價格要跟住國際，投資中化肥同買油股同金股一樣，主要係睇國際鉀肥價格，呢排鉀肥價格仍係趨升，所以中化肥股價亦保持硬淨。

肥料界未來大事係中印鉀肥談判，預計價格會繼續飆高，因為農產品價格依然高企，玉米期貨創咗新高，祖國今年糧食產量目標係去到1萬億斤，所以對肥料嘅需求好大。中化肥嘅主要業務係做分銷，即係同佢第二大股東加拿大Potash有策略性合作，將氮磷鉀同複合肥運去內地銷售，而鉀肥係主要收入來源。古勝對中海石化同中化肥都鍾意，短線會博後者。

古勝