絲絲講場：單偉彪至愛打橋牌
絲絲平日都有好多嗜好，除咗Shopping，仲會玩吓唔同嘅運動，不過惠記集團（00610）副主席單偉彪就只好一種玩意，就係橋牌，對玩橋牌全情投入嘅佢，仲做埋香港橋牌會主席添。佢同絲絲講，話做橋牌會主席好忙，好多嘢要搞，好似佢哋喺本月就會去馬來西亞，參加亞太區嘅比賽。
「牌腳」不乏高官名人
講起橋牌，絲絲只係知道要4個人一齊玩，單生咁忙，咪好難約齊腳打橋牌？佢話依家可以上網玩，據佢所知，喺中港兩地識玩橋牌嘅政商名人都有唔少，當中有部分仲同佢玩過添。佢又話，玩橋牌唔係為咗傾生意，因為喺玩橋牌嘅時候會全情投入，其他嘢都唔記得晒。
絲絲以為咁多高官名人玩橋牌，一定好難入會，但單生話入會費原來只係400蚊，佢仲話橋牌易學難精。據絲絲了解，單生私人都有贊助香港橋牌會，可謂出錢又出力支持。
至於惠記旗下嘅龍舟隊，已經成立咗好耐，單生自己就冇落場玩，但得閒都會去打吓氣。
余絲韻