作為房地產信託基金，除咗要提升旗下物業質素藉以收多啲租金，亦要收購物業以壯大租金收入。領匯（00823）喺最近一年積極物色可收購嘅商場，以往管理層出席公開場合都會用「拍緊拖」嚟比喻仍處於洽購嘅階段，即係仲未可以「簽紙結婚」，不過尋日領匯公布買咗南豐嘅將軍澳南豐廣場商場部分，執行董事兼首席財務總監張利民就話：「弊嘞！以後買物業唔可以再用呢個比喻！」因為喺香港，重婚係犯法嘛！
絲絲嘅男性朋友就笑住話，不如將領匯轉做一家回教嘅公司，因為回教法律容許男人可以娶4個老婆，橫掂南豐都好似總共有4個商場物業，咁就可以一次過「娶」晒過嚟囉。張利民亦冇上當，話與南豐就買埋佢哋其他嘅商場未有共識，而且領匯未必只係買4個商場咁少。
絲絲隨即獻計，話不如以後改用生BB做比喻啦，咁你想生幾多個都可以嘛，一次過整個三胞胎都得。好彩家計會都好耐冇再推廣「兩個夠晒數」，如果唔係，領匯買兩個商場就要停嘞。
余絲韻