絲絲講場：歐肇基退任恒地財監
恒地（00012）尋日出公告，話64歲嘅執行董事兼首席財務總監歐肇基決定退出頻繁嘅商業活動，喺下月一日起唔做首席財務總監，調為非執行董事。歐肇基去年喺恒地嘅總薪酬有1,318萬元，相信退任後每年只收取約30萬嘅董事袍金。
喺○五年十二月開始做恒地首席財務總監嘅歐肇基係銀行家出身，做過恒生及新加坡華僑銀行嘅行政總裁。雖然話退出頻繁嘅商業活動，不過佢仍出任陽光房託（00435）管理人恒基陽光資產主席及非執行董事，以及集團旗下香港小輪（00050）及美麗華酒店（00071）非執行董事。
小股東投訴冇得食
另外，恒地尋日喺四季酒店舉行股東會，幾十個記者一早到場諗住搵「四叔」李兆基傾偈，有一位小股東見到咁多記者，就投訴話因為準備畀小股東嘅茶點已經派晒，要佢聽日先至嚟拎過，佢好嬲咁話：「如果聽日我仲嚟，我咪好Cheap？不過我覺得恒地嘅安排仲Cheap！」好彩恒地公關馬上安撫咗呢位小股東，咁先解決咗件事。
其實恒地除咗對股東好，對記者都好好架，與大家傾完偈後，在場咁多位記者都可以得到最新出版嘅四叔自傳，絲絲梗係開心啦，因為到場嘅股東都攞唔到架！
余絲韻