絲絲講場：陸庭龍拍胡兆康獻技
絲絲成日都話恒生（00011）好支持本地運動發展，原來佢哋嘅員工一樣係運動健將！恒生早前舉行「2011『恒生團隊盃』保齡球賽」，該行私人銀行及信託服務主管陸庭龍（Alan）仲親身上陣，與香港保齡球隊代表胡兆康組隊進行表演賽，大家都知Alan對於理財投資就非常叻，唔知佢「碌齡」喺咪一樣咁醒呢？
喺表演賽度，Alan與胡兆康組成拍檔，與賽事嘅得獎球手切磋球技，絲絲聽老友講，話胡兆康向Alan分享咗唔少打波心得，相信Alan應該得益不少。打完表演賽後，Alan與胡兆康擔任頒獎嘉賓之餘，更與比賽球手打成一片，合照傾偈唔在講，更一齊打掌印及簽名留念。
200員工及家屬參賽
講番呢個賽事，共吸引咗200名恒生嘅員工及家屬參加，大家嘅水平都相當接近，多次出現同分需要重賽嘅情況，難怪Alan都話，主管與同事嘅默契相當好，得獎隊伍亦好有打保齡球嘅熱誠，佢仲透露，話今次比賽嘅「戰衣」及啦啦隊服裝係由部門主管贊助。除咗保齡球之外，恒生每年亦舉行多項球類比賽，包括羽毛球、乒乓球、籃球、足球及高爾夫球，去年參加人數達700人，較前年多出三成。
余絲韻