市場熱線：粵海投資水源充足

古勝話跌穿250日線其中一個可能性係嚇鬼，但如果扮到有支持力就反而仲驚，尋日跌穿250日線只係半日光景，要震貨嫌唔夠喉，V形反彈又爭啲。尋日成交超過800億元，無疑明顯多咗，標普期貨喺4點時升緊，但恒指期貨收市卻大低水124點，個市仲未坐得穩。

民企股黑氣未過

尋日最得意就係第一幅波老道地皮拍賣以近下限成交之後，魚缸開始V彈。以前逢親賣地，就算拍賣價遠高過預期，股市多數跌；今次新地王大熱倒灶，股市反而回升，連賣地都有相反理論。地主股尋日托起個市，「起孖」嘅長實（00001）升近1%。

內銀股則普遍跌1至2%，加息傳聞拖累滬綜指跌46點，阿爺叫錢莊放水畀中小企，但壞帳點算？呢排最當黑嘅係民企，問錢莊借到錢都要捱貴息，美國又全面針對中資股，連孖展都唔准借，所以民企股呢排風聲鶴唳，超大（00682）、中綠食品（00904）同中國無線（02369）繼續被洗白白，就算綠森集團（00094）大彈42%都無補於事。

民企股亦分兩類，一類打開門做生意，條數假極有個譜，例如雨潤（01068）同國美（00493）等，但業務透明度低嘅民企就要捱沽。唔單止民企股股災，細價股亦蛋散，時富金融（00510）一跌就超過五成。

阿爺認為通脹其中一樣元兇係物流成本過高，所以整咗個支援物流業方案，其中一樣係降低公路收費。香港冇乜物流股，所以炒起咗3隻卡車股：濰柴（02338）、重汽（03808）同東風（00489），濰柴早段已升4%，跟住花旗出報告叫人沽售，隻股由升轉跌，臨尾再拗腰升4%收市。公路股聽見減價自然腳軟，但隻成渝高速（00107）反而升6%，原來係大摩唱好。

息率將持續提高

呢排揀股適宜穩陣，講到穩陣，又點少得粵海投資（00270），隻股尋日升4.34%收報4.09元，淨係靠東江水已撐起大半收入，往績PE得10倍幾，而息率已升到3.6厘，逐步追得上兩電（00002及00006）。公司喺上個禮拜股東會之後話，阿媽會喺適當時候唧入供水同基建項目，如果係供水嘅話，會進一步突出其水股形象，祖國今年會推動水電油氣價格改革，水費有上升空間。

粵投話會分拆酒店業已講咗好耐，等到頸都長埋，近年祖國酒店業的確有起色，房租同入住率已止跌回升，但分拆當然要睇市場氣氛。另外，公司亦有電廠、百貨同公路等項目，不過，東江水至係公司嘅大水喉，出年同香港嘅供水合同到期，又可傾加水費，同兩電比較，其實PE更吸引，佢嘅財政狀況每年正在改善，派息遲早追得上兩電同領匯（00823）。

戰報

申洲國際（02313）+15%

申洲國際尋日高位見10.72元，古晨五月十三日推介時低位9.36元，累計錄得近15%進帳。

銀泰百貨（01833） +10%

帥哥五月十九日推介嘅銀泰百貨，尋日高見14.22元，以當日低位12.96元計，都有近一成升幅。

古勝