馮國綸陪老婆睇騷
Prada每年都會最少搞一次「花生騷」，今次對佢哋嚟講當然冇難度。尋日絲絲見到利豐（00494）執行副主席馮國綸夫婦來捧場，馮生話佢係陪老婆嚟睇騷；同場仲見賭王四太梁安琪，而財經事務及庫務局副局長梁鳳儀亦有捧場，可見Prada嘅吸引力有幾大。絲絲聽朋友講，話呢場「花生騷」有好多人爭住攞入場券，可謂一票難求。Prada管理層喺完騷後，再同投資者傾吓偈，仲送禮品，皆大歡喜。
Prada今次喺香港上市嘅編號係1913，實情係佢哋嘅「出生」年份，MarioPrada於一九一三年喺米蘭創立呢個品牌，至今差唔多有一百年，Prada指定要呢個靚冧巴，咁即係要攞100萬元出嚟做善事啦！