絲絲講場：贊助中學生領袖培訓 上市委踩單車籌款
港交所（00388）上市委員會喺上周六舉行咗一項名為「Pedal Power」嘅活動，透過踏單車籌款贊助本地中學生參加外展訓練學校嘅5日領袖培訓課程，絲絲聽聞今次係上市委員會第一次進行嘅企業社會責任活動。
當日絲絲都有去支持，唔單只係上市委員會嘅成員，佢哋嘅家屬、港交所上市科職員以及一位董事會成員亦有參加，總人數逾50人嘅車隊浩浩蕩蕩咁喺烈日當空下，踩咗18公里嘅路。
撥捐審慎如批IPO
上市委員會主席高育賢話，今次「Pedal Power」活動估計可籌到逾80萬元，為咗好好咁利用呢筆善款，上市委員會將成立小組委員會，與外展訓練學校共同釐定善款受益人嘅甄選條件，確保參與領袖培訓課程嘅學生，均來自缺乏資金參與呢類訓練嘅本地中學。上市委員會平時評審新公司上市時，態度嚴謹就係人都知，估唔到運用善款亦一絲不苟，有份捐獻嘅朋友可以放心。
余絲韻