市場熱線：特步寧買當頭起

尋日表現較好嘅係本地零售股同濠賭股，近日公布嘅四月香港零售銷售同五月澳門博彩收入都係好高增長，所以借數據炒起。最特別係謝瑞麟（00417），前日派成績表後大插，尋日又反彈近一成；前日插可以解釋係獲利回吐，但計新PE得10倍左右，零售股咁平真係少有。

A股不濟有藉口賴

尋日祖國公布五月PMI係52，並冇預期咁差，算係好消息，但滬綜指幾乎平收。國際板傳聞會喺十月面世，連可口可樂都話有興趣，但呢排A股不濟，國際板就被指搭沉船，賭仔梗係姓賴，好多時係先有結果、再搵原因。話時話，股民同胞十個有九個係炒鬼，得一個係巴菲特，點會對可樂有興趣？

政府發行嘅通脹掛鈎債券會用新股形式發售，仲應該一人一手添，但一手每年收息得4、5舊水，可能好多人連申請都費事，尋日三大公用股齊創新高，隻收息股匯賢（87001）亦上到4.93元人仔，但領匯（00823）派成績表後回吐2.6%。講到食息，人人口味唔同，如果覺得美金會長期貶值，其實最好揸高息外幣。

尋日MSCI指數完成調整之後，中國指數7隻新貴全部仆直，買股票其實係同莊家鬥智，唔能夠一本通書睇到老，但有啲股係有慣性，好似聯想（00992）每次派完成績表都會有陣虛火，然後就腳軟，尋日公司有收購，用2.3億歐元買德國電子廠商37%股權，但聯想以前買IBM要好多年至翻身，所以聽到公司買嘢，股價反而跌3.3%。

本地零售股炒到㷫合合，但祖國零售股就靜咗一輪，有人歸咎係實施購物卡實名制會影響消費意欲，因為祖國好多消費係用購物卡，但阿爺為免洗黑錢同貪污行賄所以出新招，所謂上有政策、下有對策，內地零售股相反可以趁低吸納。尋日幾隻體育用品股表現唔錯，古勝較為睇好特步（01368），早前伯明翰降班，有人覺得佢蝕咗，但贊助英超球隊肯定同英冠唔同，其實冇乜蝕底，中國品牌話想進軍國際亦係搞笑。

定單維持理想增長

體育用品股已經大執位，剩得安踏（02020）一枝獨秀，原本兩隻龍頭李寧（02331）同中動向（03818）市值得番140億元，特步只係少幾億，而匹克體育（01968）同361度（01361）亦好接近，呢幾隻各有唔同市場定位，古勝寧買當頭起，特步舊年賺多26%，第四季訂貨會定單金額亦增長24%，今年預測PE約11.5倍，喺體育用品股當中唔係最平，但卻屬穩紮穩打，圖表走勢亦沿上升軌一路升。

戰報

申洲國際（02313）

申洲尋日高收10.72元，小尾上周四已吼實，以推介日低位9.74元計，帳面已賺超過一成。

I.T（00999）+23%

I.T尋日再升至高位7.73元，帥哥上周三話炒業績，跟佢於當日低位6.27元上車，賺逾23%。

古勝