絲絲講場：猛人加盟致富主席四萬口
絲絲早前去咗致富集團嘅酒會，見到佢哋個主席周松堦開心到滿場飛，不停地同啲嘉賓飲紅酒同傾偈，皆因佢哋搵咗中國人民大學風險投資研究中心主任劉曼虹教授加盟成為致富集團嘅董事，就連證監會前主席梁定邦都賞面出席個酒會。
連梁定邦都畀面現身
除咗劉教授加盟之外，當日周松堦隆重宣布，劉教授會出新書《綠色經濟及在中國的實施》。梁定邦上台致辭時話，喺一九九五年，佢做緊證監會主席時就已經識得劉教授，今次老朋友出新書，就一定要親身出席支持喎！唔怪之得近年好低調嘅佢都肯現身啦！
絲絲當晚仲見到唔少中外知名學者出席酒會，好似北京大學經濟學院院長孫祁祥教授同埋中國國土資源部特約監察員黃海峰教授等重量級嘉賓，而本地多家窩輪發行人，好似渣打銀行認股證銷售董事翁世權、美林亞太區股票結構性產品部董事黃書耀等都係當日嘅嘉賓。
余絲韻