香港同內地樓價愈升愈有，無論係香港定係內地搞地產嘅發展商，近年都咪話唔賺到笑。
絲絲聽聞內地發展商恒大地產（03333）個老闆許家印，就喺香港置業，大拿拿用咗四億五，買咗山頂布力徑6至10號嘅3號洋房。
絲絲尋日見到許老闆，即刻恭喜佢買咗幢靚屋，你知啦，香港啲靚house，就好似古董咁，買一間就少一間。許老闆話間屋會留番嚟自住，唔講唔知，今次係佢第一次喺香港買樓。
唔少內地富豪都要成日穿梭中港兩地，而恒大係香港上市公司，每個月都會同大家公布一下佢哋每個月嘅情況，可見許老闆時不時都會嚟香港住吓。許老闆話，佢個人喺內地嘅物業就有好多，不過佢身為香港居民，反而喺呢度就屋仔都無間，所以今次咪喺香港買番間囉！
絲絲成日呻香港樓價高，點知腰纏萬貫嘅許老闆，都話香港嘅樓真係幾貴！佢謙啫，恒大股價係咁升，今次用幾億買間豪宅「上車」，就當係獎勵吓自己囉！
余絲韻