電源及數據線產銷商鉦皓控股（08132）以配售方式招股，按每股0.3元配售1.65億股，集資淨額不到三千萬元，保薦人為博大資本國際，周三於創業板掛牌。
鉦皓主要出品超過40款供手機使用嘅電源及數據線產品，以及超過450類家電器使用的電源線及插座。另外，集團亦會生產冇連接插頭嘅裸線材，組裝及銷售針對病人住院期間使用嘅醫療控制裝置。集團估計今年純利起碼有1,800萬元，每股盈利唔少過3.27仙，如果用配售價計算，預測PE大約9倍多。
全球智能手機市場增長強勁，大大刺激周邊配件，如電源及數據線嘅需求。鉦皓在行內有廿多年經驗，又擁有固定客源，收入可保持穩定增長。如果未來再成功開發更多新產品，更有望成為集團增長引擎，改善毛利率。與此同時，集團○九年透過成立鉦鑑科技發展醫療控制及裝置業務，而現時產品主要銷售到美國醫療設備製造商，如果再可進一步開拓埋神州市場咁就冇得頂。
公司用得全配股方式招股，散戶只能等到公司正式掛牌後先可以在市場吸納。因為街貨唔多，僧多粥少，貨源歸邊有可能令股價容易被炒高。但記住風高就浪急，唔理賺定蝕，到位一定要走。
香港大學電子金融服務榮譽助理教授 徐燦傑