中國富豪數目好多，年輕富豪亦唔少，專門發布富豪身家排名嘅胡潤研究院剛啱發表咗佢哋首個《少壯派富豪榜》，總共有56位年齡40歲以下嘅少壯派富豪上榜，其中有9人更加係「八十後」。入榜門檻係身家最少要有10億元（人民幣‧下同），除咗騰訊（00700）主席馬化騰理所當然咁入榜之外，榜內居然出現林海峰及劉曉慶嘅名字！
講緊嘅當然唔係香港DJ及內地女演員啦，而係東方日升公司嘅林海峰（36歲）以及壹橋苗業嘅劉曉慶（24歲），佢兩位喺《少壯派富豪榜》內分別排名15及25位。至於首3位就分別係馬化騰（39歲）、碧桂園（02007）執行董事楊惠妍（30歲）以及專門做LED嘅三安公司林志強（37歲），佢哋3人嘅財富分別有320億、240億及150億元。
呢個榜仲提到有44人係白手興家，有12人係繼承財產嘅「富二代」，楊惠妍就排喺富二代嘅首位。呢班少壯富豪分別來自各行各業，當中以資訊科技界嘅人數佔最多，有15人，從事地產業有13人，製造業就有10人。
富二代嘅共通點係普遍有本科以上大學學歷，近兩成人仲有研究生以上嘅學歷，超過一半人喺歐美接受教育。報告話有唔少富二代由於個人財富難以計算而暫時排除榜外，當中有娃哈哈董事長宗慶後女兒宗馥莉、三一集團董事長梁穩根兒子梁在中及世茂集團董事長許榮茂兒子許世壇等。
余絲韻