滙控（00005）喺本周四舉行每年一度嘅非正式股東大會，主席范智廉及行政總裁歐智華繼續「行孖咇」主持大局，兩人上周喺倫敦舉行嘅馬拉松式「策略日」都答咗好多問題，今次股東會嘅焦點可能會係鄭海泉，因為喺嗰日之後，佢就正式告別滙控董事局，唔再做執董。
鄭海泉既然唔再重選執董，長情嘅滙控股東以後就冇機會再喺股東會見到佢，大家當然要珍惜呢次機會啦。絲絲記得滙控公布鄭海泉唔再連任時，冇詳細講佢會唔會繼續擔任滙豐中國董事長及滙豐台灣區主席呢兩個職銜，只係話佢「將會擔當顧問，就區域事務向集團行政總裁提供意見，繼續為集團服務」，絲絲到時都要把握機會問清楚。
據絲絲所知，到時會有5位高層出席香港嘅股東會，除咗上述3人外，喺「策略日」被歐智華多次點名嘅滙豐亞太區行政總裁王冬勝亦當然有份，而另一位新面孔亦會喺當日首次與股東見面，佢就係去年頂替麥榮恩出任滙豐亞太區財務總監嘅李瑞霞（Sarah Legg），麥榮恩依家就做咗滙控財務董事。到咗本月二十七日嘅正式股東大會，場面會更盛大，因為有好多主要股東都會趁機向「范歐配」質詢。
余絲韻