期指觀瀾：耐心等待見底訊號
過去幾個交易日的港股，真係反覆到得人驚，當筆者還後悔上星期四蝕百多點下將好倉止蝕，是走得太早，睇見昨日市況，反而係抹一額汗。
昨日期指開低348點，開出22,935點，早段好友曾經反攻，現貨開市幾分鐘後，期指見全日高位23,066點，好友似乎怯於歐債危機升級，承接力不足，之後接近五小時的交易時段，大市以單一方向拾級而下，午後22,850點的支持連番受到考驗，直到四點現貨收市後，大量冚倉盤湧現，期指直奔全日低位22,772點，收報22,776點，較恒指足足低水184點，減去除息因素也低水97點之多，現貨成交唔算多，得601億元。
期指全日成交67,710張，但收市前的一刻跳價落，居然在22,860點以下有超過3,000套成交，係套戥盤要趕及收市建倉？筆者不得而知。
要大市轉勢，現貨重返23,335及23,509點樓上，是最低要求，恒指波幅指數昨日急升1.54去到18.77，是三月底以來最高，基於追沽已失先機，筆者會選擇保守地等市況有短期見底訊號再博反彈。
John Mullen