市場熱線：興達博財息兼收

外圍利淡消息主要係IMF揸Fit人涉性侵犯案而被紐約警方拘捕，消息震驚政經二界。古勝同大家一樣，對呢位政客嘅風流史冇興趣，而係關注事件會否影響解決歐債問題進度，進而令整個歐洲局勢生變，呢鋪歐洲佬真係多災多難，兼夾佗衰家。

魚缸「五行欠水」難升

針對兩地股市，古勝相信，嚟緊一係維持上落市，一係就單邊向下，冇大升條件，主要係資金面緊絀情況將轉趨嚴重。點解咁講？人行剛重啟三年期央票，又再急急腳加RRR，用實際行動說明RRR「冇頂」，雙管齊下勢必強化流動性回收嘅效果，股市「五行欠水」已成定局！更令人擔心係，六月以後公開市場票據到期量將明顯回落，近期美元持續反彈亦令熱錢會否持續流入帶來變數，本來已趨緊嘅銀根可能比想像中嚴峻，唔怪得表叔線話，最壞情況係「十一」前都要拉緊褲頭過日子。

不過，呢個世界冇絕對，一個銀仔總有兩面，樂觀啲諗，今年炒股收穫如何，極可能視乎能否成功捕捉市場資金面由從緊轉變至復常之間嘅轉捩點。如今看官最重要係保留實力，耐心等候入市機會。

大笨象（00005）投資者策略會曲終人散，雷聲大雨點小。歐大班話要為雄獅重振獅威，志向夠大，但謀事在人，成事在天！尋日股價跌1.5%，收報81.8元，顯示股民頭腦清醒，未受高管壯志口號影響。老實講，依家大笨象PB1.3倍，論估值已足以吸引長線投資者落場，只係今時唔同往日，全球金融市場動盪沒完沒了，昔日嘅「多元化」市場策略，如今成為絆住象腳嘅大石，單靠抹紅（赴滬國際板掛牌），未必就可以飛得起。

高毛利產品拓財路

「中投三寶」榮辱互見，保利協鑫（03800）同旭光（00067）分別跌4.5%及10.6%，反而中芯（00981）仲睇得吓，收報0.89元，升1.1%，過去七、八年呢隻沉船積聚咗大量蟹貨，但上月中以來股價一口氣上浮五成，實在唔簡單，周四季績前後要目及實。

專門做子午輪胎鋼簾線嘅興達國際（01899），上周五趁升市重上9元樓上，尋日亦企得住，高位仲見過9.43元，收報9.18元，逆市升1.7%。近年公司重點研發嘅高毛利產品─切割鋼絲，今年大量投產，由於可應用於手機晶片和太陽能電池製造，銷情值得期待，基金們睇好公司成功開拓財路，加上有條件沾上「新能源」概念，股價強勢有因，本周五派息除淨，可以博財息兼收！

戰報

大成生化（00809）+14%

大成生化尋日高見2.54元，古晨於上周四推介時低位只係2.22元，跟佢上車短炒又賺超過14%。

百營環球資源（00761）+13%

帥哥上周四話百營環球炒味濃，尋日高見0.158元，以當日低位0.139元計，揸幾日已賺逾13%。

古勝