內地嘅「現代紅娘」網站世紀佳緣尋日喺美國納斯達克上市，但佢哋與投資者嘅緣分或者未夠，首日掛牌就跌破招股價，莫非啲投資者唔願意與佢哋「長相廝守」，只係想嚟個Speed dating？
世紀佳緣幫人做月老牽紅線，搞相睇活動，今次有i-banker為佢哋與華爾街牽紅線，去美國上市，世紀佳緣仲揀咗「ＤＡＴＥ」作為股份代號，完全反映公司業務，令投資者易記啲；不過啲投資者可能只係諗住與世紀佳緣「ＤＡＴＥ」（約會），一上市就掟貨走人，令世紀佳緣首日股價一度大跌一成一，結果收市都係「破底」收場，全日跌百分之四。
依家有好多內地網站去納市掛牌，內地網股選擇多，投資者自然揀擇。查實紅娘網真係有得做，以前有話「媒妁之言」，就知媒人喺中國人婚姻佔幾重要嘅角色，而且中國嘅單身男女市場有成兩億人，不過，外國投資者可能唔明到底市場嘅需求有幾咁大。
其實計絲絲話，世紀佳緣不如考慮來港上市，香港未婚率高，又背靠內地，相信投資者應該會Buy佢哋嘅投資概念。
余絲韻