絲絲講場：商交所獲兩華資大行埋堆
籌備三載嘅商交所終於守得雲開見月明，喺下周三（十八日）開業，佢哋尋日喺九龍站一家型格酒店，搵嚟初期一班經紀會員撐場，為下周正式開鑼造勢。商交所並公布再增添兩名新會員，分別係廣發期貨（香港）及南華期貨（香港），令初期會員人數增至18名。
廣發期貨及南華期貨來頭唔細，係內地其中兩家獲准喺本港經營期貨業務嘅最大公司。最近才加入廣發期貨做副總經理嘅丁世民以及中銀國際副執行總裁謝湧海亦有現身撐場，兩人仲一同唱好商交所前景。
謝湧海撐場唱好
謝湧海話，商交所喺戰略上具地理優勢，因為目前主要嘅黃金消費國家係中國及印度，而上海依家只能進行境內嘅黃金交易，所以商交所對內地及國際投資者嚟講更具彈性。
佢睇好商交所黃金期貨嘅成交量，話適合專業投資者及業界進行對沖活動，但初期交投太多，估計需要最少一至兩年時間發展。
丁世民亦都睇好商交所發展，認為商交所應積極爭取喺短期內推出新產品，擴大競爭優勢，而商交所嘅交易時間能覆蓋亞洲及歐洲市場，亦係競爭優勢之一。
事實上，商交所已準備爭取喺短期內再推以人民幣報價嘅黃金期貨產品，總裁艾伯特仲話會考慮推出能源、農產品如咖啡豆或糖等產品。
余絲韻