胡潤上海財富白皮書尋日出爐，上海係內地金融發展最快嘅地區，多富人係正常嘅現象，結果顯示，喺上海每175人中，就孕育出一名千萬富豪，三大首富分別係東方希望嘅劉永行家族、世茂房地產（00813）嘅許榮茂家族以及服裝品牌美邦集團嘅周永健家族，至於最年輕嘅，就係籃球巨星姚明。
根據胡潤榜嘅統計，上海嘅千萬富豪有13.2萬人，比去年多8.2%；億萬富豪就有7,800人，亦較去年多6.8%。上海富豪之多，僅次於北京嘅17萬人。
呢批千萬富豪平均年齡只有39歲，真係大把前途，當中有唔少係企業主席、房地產投資者及跨國公司高層等。姚明係百大富豪榜中最年輕嘅，以10億元排第94位。
胡潤百富創辦人兼首席調研員胡潤話，上海有咁多千萬富豪，係由於當地經濟及地產快速發展，上海嘅GDP增長高達9.9%，當地房價上漲，高檔樓房嘅價格漲幅就更驚人，按年上升21%。
至於億萬富豪就唔係淨係靠炒樓炒股，好多係因為藝術品收藏升值以及投資老洋房而令身家暴漲。
富豪榜排名首兩位嘅劉永行及許榮茂，坐擁資產分別達350億及330億元人民幣，佢哋有冇收埋好多珍貴藝術品就不得而知喇。
余絲韻