市場熱線：一拖逆市顯功架

恒指收報23,073點，講跌幅唔夠1個巴仙，但期指大低水208點，總成交額得677億元，尋日賣地對個市冇乜影響，地價高亦係預咗，值得注意嘅反而係中國海外（00688）出擊得手，中國海外喺九七年之後集中火力攻內地，依家高價搶地，希望佢哋唔好摸頂。

玩細價股要識止蝕

個市好似跌得唔多，但藍籌股得兩隻升，二三線股亦氣氛轉差。QQ（00700）一枝獨秀，首季成績表靚仔兼獲大行唱好，隻股的確冇得彈除咗─太貴。「超人」都興溝貨，佢以0.62元增持隻中聚電池（00729），當係溝淡成本，結果中聚尋日當然應聲彈起，收報0.86元，連帶隻中國木業（00269）亦連升六日，散戶只能跟超人尾，但隨時會高買低沽。古勝亦一直唔贊成溝貨，輸就要認錯，孖屐咁多隻股票，可以搵第二隻股票報仇。

尤其細價股，你同佢鬥長命等同嫌命長，上市時曾經升到你唔信嘅香港生命（08212）不經不覺已淪為仙股，中國置業（00736）連供股價6.8仙都隊穿埋，香港好多不斷向下炒嘅股票，古勝唔反對投機搭順風車，但要嚴守止蝕。

旭光（00067）以「三陽一陰」式45度角上升，前日破例開到第4支陽燭，但尋日支陰燭就大支囉！先創新高再倒跌逾10%。中投近期三隻杰作：旭光、中芯（00981）同保利協鑫（03800）尋日不約而同都係創新高後倒跌，後兩者跌幅4.4至4.6%。中投散貨又冇咁早，因為除咗協鑫係正式入股外，中投認購旭光同中芯只係可換股債券、可換股優先股同認股權證，但有冇暗手則天曉得。

講到好股，除咗QQ之外，第一拖拉機（00038）亦係數一數二，在下一直長期推介，上個月創咗11.5元新高，近半個月魚缸回調，佢仍然保持硬淨，呢兩年半長揸根本未驚過，主要係有基本因素支持，舊年賺多一倍以上，管理層話今年首季收入亦升13%，阿爺年年增加農機購置補貼，真係冇乜邊個行業有佢咁着數。

擴大外銷出口市場

當然，最大風險係阿爺縮手唔再補貼，好似汽車咁今年突然乜嘢優惠都取消晒，搞到今年銷量一月不如一月。不過，一拖應該唔使憂，至少拖拉機唔會搞到塞車，而中央今年拍心口要糧食增產到1萬億斤，要拖拉機幫手唔少得。

一拖除咗喺祖國生意好外，亦會繼續擴大外銷，希望出口比重可提高到30%，故早排亦收購咗一間法國公司。國產嘅拖拉機靠平爭生意，就算人仔升值仍有好大價格優勢，公司同時會擴大產能，大中輪拖會由依家嘅年產6.9萬台增至一五年嘅17萬台。

戰報

海隆控股（01623）+16%

帥哥上周五推介嘅海隆尋日逆市炒上，最高見過2.85元，以推介日低位2.46元計，已賺近16%。

志高控股（00449）+14%

志高尋日發力，炒上高位0.89元，詩詩周一推介時低位0.78元，跟佢上車走番轉，又賺逾14%。

古勝