近年投資界熱捧礦業股，絲絲尋日就去咗南亞礦業（00705）嘅飯局湊熱鬧，八卦吓馬來西亞嘅礦業發展，一聽之下，先知原來馬來西亞嘅礦業發展已經蓬勃到好似旅遊業咁，連的士司機都識帶你去睇礦。
南亞礦業執行董事梁維君話，中國近年回收咗好多礦場嘅發展權，以免盲目開發，一眾內地老闆苦無投資機會之下，惟有向外闖，於是大部分都向礦產豐富、語言又溝通到嘅馬來西亞靠攏。可能馬來西亞嘅的士司機去礦場到慣晒，以後只要一見到「疑似中國人」，就會開口問佢哋「係咪去睇礦？」
絲絲聽完真係笑咗，呢個情況同當年返內地差唔多，分別只係內地司機問絲絲「要唔要食好嘢」，馬來西亞司機就問「買唔買礦」。銀碼係唔同咗，但對話嘅意境就完全冇分別嘞。
余絲韻