絲絲講場：國產內訌華為控中興侵權
智能手機發展如日方中，手機商均爭相推出產品搶市，亦因此會發生唔少有關侵權嘅紛爭。就好似最近蘋果公司及三星互相控告對方侵權之際，內地電訊設備「一哥」華為亦控告中興通訊（00763）侵犯專利權及商標權。以往外資公司控告中資公司侵權行為屢見不鮮，但好似今次「自己人打自己人」就真係較少見，絲絲當然即刻聯絡中興方面想了解多啲，可惜未獲回應。
德法匈三國提訴訟
華為喺尋日發出通知，話佢哋已經喺德國、法國及匈牙利提出訴訟，控告中興通訊侵犯佢哋嘅專利權及商標權，包括華為關於數據卡及LTE（Long Term Evolution）技術嘅多項專利；此外，喺未經佢哋同意下，中興喺部分數據卡產品上非法採用咗華為嘅註冊商標。華為仲話，其實佢哋一早已向中興發出停用警告，又多次希望進行交叉專利談判去解決，但中興冇理會，所以要訴諸法律。其實內地盜版及侵權行為仲係好嚴重，華為話提訟係希望其他人循正途賺錢，尊重他人嘅科研成果。
余絲韻