絲絲講場：胡文新母親節有搞作？
母親節就快到，好多孝順仔、孝順女都會密謀點樣同阿媽慶祝，尋日絲絲見到合和實業（00054）董事總經理胡文新（Thomas），當然問吓佢有乜嘢神秘節目獻畀母親胡郭秀萍，話明「神秘」，Thomas梗係三緘其口啦，不過佢話一定會送花，因為呢個係每年母親節嘅指定動作。
剛飛北京主持冰球賽
講開剛啱過咗嘅復活節，Thomas原來飛咗去北京，為佢做主席嘅香港業餘冰球會舉辦青少年冰球比賽主持開幕，今次計分賽喺二月已在香港打完首輪比賽，復活節就喺北京打第二輪，最後一輪比賽喺六月於哈爾濱舉行，有香港、中華台北及哈爾濱等隊伍參與。絲絲問Thomas點解自己唔落場打，佢即刻哈哈大笑，話「我唔係青少年」吖嘛！
Thomas又問絲絲最近有冇睇由古天樂做主角嘅一套電影，原來片中嗰幢景色優美嘅豪宅，就係合和實業旗下嘅跑馬地樂天峯，佢哋借咗畀電影公司作為場景，Thomas話當係為樂天峯做免費宣傳。
余絲韻