市場熱線：海爾終非池中物

恒指3連跌，加埋跌咗333點唔算多，但氣氛都幾受影響，港股處於夾縫之中，美股升到三年新高，A股卻唔爭氣。古勝見第一季唔上唔落，諗住第二季可以玩吓單邊，仲預測恒指有機會衝破兩萬五，點知成個月幾乎打回原形。五月仍有機會做單邊，但傳統上呢個月係偏淡，中國人有話「五窮六絕七翻身」，鬼佬話「sell in May」，所以要小心提防單邊落。

另類借錢股有追捧

孖屐最關心老美嘅銀根鬆定緊，阿伯前晚好風騷咁出席記者會，佢冇交代幾時會加息，但話最快要開多兩次會至決定，又話依家通脹低同支持強美元，強的確係強，但係強詞奪理個強，聽完佢講，美金再跌多幾錢重，真係信佢一成、雙目失明。

祖國錢莊股呢兩日派首季成績表，尋日個別發展，但由於呢幾日不斷傳加息同收緊資本需求，所以兩隻另類借錢股特別精神，古勝上個禮拜推介嘅遠東宏信（03360）升6.3%再創新高，中國信貸（08207）亦曾升6.8%但尾段回軟。

道指同標普創三年新高，但納指就更犀利，創咗○一年科網爆破以來嘅最高位，美國嘅科技股業績頂呱呱，祖國嘅百度亦大賺特賺，所以香港上市嘅科網股亦受帶挈，QQ（00700）尋日一度升7.4元，而網龍（00777）同太平洋網絡（00543）齊創新高。

第一隻人仔股票匯賢（87001）今日就掛牌，暗盤價潛水，招股同股價反應與原先預期差好遠，皆因有三十八年限期要交番畀阿公。中國汽車系統即刻打退堂鼓唔上住，啱啱完成招股嘅幕牆生產商遠大（02789）反應亦麻麻，本來大批排隊上市嘅新股可能有一半要拖住先。

夠條件做「農村國美」

依家手機同手提電腦畀蘋果公司玩晒，祖國嘅電器市場亦開始強弱分明，冷氣機係格力，洗衣機係海爾電器（01169）同美的，其他牌子市佔率被逐步拋離。海爾除咗洗衣機賣得之外，舊年開始搞埋農村分銷、物流業務，遲啲可能做埋零售同售後服務等，「農村國美」概念逐步形成，所以股價一路反覆上升。

一二線城市依家好睇唔好食，平板電視同雪櫃喺大城市開始見到銷售倒退，反而農村賣電器現處於高增長，舊年全國家電市場規模萬多億人仔，三四線城市佔咗一半以上，可知規模幾龐大。海爾轉型正係時候，城鎮化同埋保障房落成亦係刺激家電銷售嘅兩大概念。

不過，海爾關鍵係能否吸引其他牌子加盟，旗下「日日順」依家主要賣嘅係海爾自家品牌同少數外國牌子，但如果做得網絡夠好嘅話，做「農村國美」唔係難事。

戰報

中國信貸（08207）+8%

詩詩周三吼中嘅中國信貸，尋日一度高見1.46元，以推介日低位1.35元計，短炒賺逾8%。

百營環球（00761）+14%

帥哥周二揀咗隻百營環球資源，於當日低位0.111元上車，至尋日高見0.127元食胡，能賺超過14%。

古勝