丁世民（Simon）喺幾個月前離開咗敦沛期貨，經過一段時間休養生息後，會喺下月三日加盟中資機構廣發控股（香港）嘅期貨部擔任副總經理一職，牌頭唔細㗎！佢仲話：「自己喺歐洲期貨交易所（Eurex）工作時，廣發已經搵我幫手，估唔到兜兜轉轉多年，彼此之間嘅緣分今日先到。」
早前Simon身體唔係太舒服，睇醫生後一直在家休養。「以前我日日瞓3個鐘，成日擔心市況走勢，卒之早前身體發出警號，喺二月時真係病得好厲害。不過，廣發期貨部盤房啲兄弟好幫得手，有大家幫輕吓，我都唔會太辛苦嘅。」
講番廣發控股，呢間行係內地十大證券行之一，公司具發展優勢，潛力好大㗎，依家有Simon加盟，相信佢哋嘅期貨部生意一定會風生水起。聽講Simon會幫公司研發兩隻新基金，之後會不時返內地公幹。屬於工作狂嘅丁Sir又要頻撲。
余絲韻