滙豐為咗令員工平衡作息生活，喺五月一日起員工會有「生日假」，恒生銀行（00011）嘅福利一樣唔少得過母行，下月開始每位同事喺生日嘅月份，同樣會有一日生日假期，絲絲記得，恒生一直都好重視員工生日，以往亦有不成文規定，同事喺生日當天可以提早兩粒鐘收工，依家仲有埋生日假，就更加貼心啦！
據絲絲了解，除咗生日假期，其實恒生仲有好多特別假期畀員工，好似義工假、公職假及考試假咁，加埋最多已經有10日。生BB嘅女職員要放產假，而男職員亦有侍產假，男職員喺仔女出世前或出世後3個月內都可以申請5日；就連領養子女都一樣有領養假，男職員有5日，女職員更加有6個星期！
其實依家銀行要留住人才，已經唔可以只單靠加人工，仲要好照顧員工嘅生活作息及感受，銀行家跑數，好多時做到不知日夜，如果唔畀多啲福利令佢哋平衡生活，到最後只會令人才流失。
余絲韻