一眾內地上市公司已出咗去年度年報，各路名人身家升跌、分咗幾多花紅一一曝光。公司上市可以幫人創造財富，但「買錯嘢」亦會令身家縮水，好似NBA巨星「移動長城」姚明持有嘅合眾思壯，股價坐完一輪「過山車」後跌到殘晒，高低價相距甚遠，姚明大嗱嗱唔見咗5,000萬元（人民幣‧下同）！
獲姚明參股嘅合眾思壯喺去年上市，但上市首年嘅業績就唔靚。合眾思壯股價曾飆升至113.98元，點知喺兩個月之後就勁冧，至尋日跌到只有43.22元。計起上嚟，由高位回落嘅跌幅高達62%，股東姚明嘅持股原本市值8,000萬元，依家連3,000萬元都唔夠。
除咗姚明，內地股市兩位大阿哥尉文淵及闞治東，佢哋持有嘅華銳風電喺上市後「破發」到依家仍未翻過身，兩人嘅身家合計蒸發咗21億元。至於喺一年前曾榮登內地首富嘅海普瑞掌門人李鋰夫婦，亦因為公司業績突然「變臉」令股價急跌，佢哋嘅身家亦蒸發咗115.8億元。
至於一向以明星股東多而聞名嘅華誼兄弟，去年亦好熱鬧，除咗阿里巴巴老闆馬雲減持華誼股份外，原來大導演馮小剛都有套現，佢最少減持咗184.8萬股華誼，套現逾4,622萬人仔。馮大導依家仲揸住近300萬股華誼，持股量與馬雲差唔多。
余絲韻