市場熱線：恒鼎大孖沙睇好

今日個個目及住聯儲局嘅會後聲明，有人估QE2玩完同加息將至，各位今朝起身已知乜料，但之前一晚美金繼續跌到逾兩年低位，澳洲紙固然升到飛起，但尋日人仔亦有料到，突然升百幾點子再創新高，坊間又有傳聞人仔短期會一次過大幅升值，搞到上海B股大跌5.33%，因為如果人仔大升，用美金計價嘅股票即係貶值。

人仔升值又翻炒

老古就唔係幾信人仔會一次過大幅升值，阿爺應該唔會咁冇義氣整死班廠佬，工廠執笠工人亦冇得撈，到時社會就唔河蟹。不過，既然孖屣炒緊呢樣嘢就要作出假設，港股如果炒人仔升值應該升至啱，但國指跌得仲多過恒指更冇道理。

賣地成績理想，地主股個別發展，但祖國地主股有較大回吐，皆因有傳發改委會對商住房徵收暴利稅，消息唔知真假，就算係真亦要睇埋詳情。從字面睇，有暴利至有暴利稅，既然有暴利，納多啲稅亦好合理。

QQ（00700）朝早升到230.8元新高，收市倒跌2.8%，報218.6元，逢親個市有乜依郁，都係升得多嘅股沽壓較大，所以聯通（00762）亦跌2.54%。股民嘅心理大多係先沽獲利貨，蟹貨反而擺埋一邊等奇迹，其實揸住強勢股、沽出弱勢股先係正路。

煤價具上調空間

尋日煤股個別發展，趁住兗煤（01171）發盈喜，兗煤同神華（01088）都創新高，但後者倒跌。發改委尋日約咗班煤老闆密斟，無非係希望佢哋手下留情，唔好加價加得太狼，皆因近期秦皇島煤價又升，比上個月升近2%，比舊年同期升咗16%。不過，12個省啱啱加咗電費，其實煤價亦有上升空間。

走勢較佳嘅煤股，除兗煤之外，要數到恒鼎（01393），呢隻仲誇張，舊年尾可以連續個幾月日日陰燭，由8.8元插落6蚊邊，呢個幾月又差唔多日日升，由6蚊樓下扯到上接近8蚊，老古都唔知隻股升夠未，但定好止蝕位短炒冇壞，等見到佢連續兩、三日回頭破壞咗個升勢就要走佬。

恒鼎都有唔少大孖沙睇好，最近見細摩增持，而交銀更加將佢嘅目標價定到11.96元咁高，並認為公司未來3年會保持每年45%嘅增長率，主要原因係睇好精煤同焦煤嘅價格會進一步向上。

戰報

中國澱粉（03838）+12%

詩詩周二推介中國澱粉，當日低位只係0.57元，尋日全日高位見0.64元，短炒賺逾12%。

新世界百貨（00825）+14%

古晨於十二日吼中隻新世界百貨，尋日一度高見7.2元，以推介日低位6.3元計，累賺逾14%。

古勝