首次踏足寶島嘅中銀監主席劉明康，已經與台灣金管會嘅官員開完兩岸銀行監理合作平台首次會議，劉明康喺會議前好親民，仲主動與人握手合照，但熱情到咗談判時就變得冷冰冰。話明係談判，仲係第一次交手添，點會咁快就有共識呀！
會後雙方共同主持記招，佢哋雖然之前傾咗幾粒鐘，但仲係有啲生疏。可能係政治敏感關係，就算官職唔細，大家仍以「先生」作稱謂。台灣銀行局長桂先農稱呼中銀監國際部主任范文仲係「文仲兄」，如果喺香港，台下肯定笑到碌地。整場記招完全冇爆肚，可知雙方都謹慎到不得了。
之前傳中銀監會送大禮畀台灣，點知得個吉，業界與投資者梗係失望喇。雖然劉明康只係開咗幾粒鐘會議，但訪台行程足足6日。佢到埗第一日就去咗日月潭遊覽，又搭過高鐵去高雄，呢幾日仲會見台灣金融界嘅代表，話唔定仲會有好消息。
（余絲韻）