騰訊（00700）起訴奇虎360隱私保護器侵權案終於有結果，法院判騰訊勝訴，奇虎360損害騰訊商業及商品信譽，要連續30日刊登公開道歉兼賠償40萬元（人民幣‧下同）。所謂好事齊來，騰訊員工獲加薪9%，公司仲成立基金免息借錢畀夥計買樓，喺一片歡愉聲下，騰訊股價尋日升咗2.4%。
去年九月，奇虎360公開指摘騰訊QQ2010軟件掃描用戶硬盤侵犯用戶私隱，之後奇虎360就推出私隱保護器，騰訊憤而要求用戶喺QQ及360之間二選一，引發3Q大戰，奇虎360與騰訊互相對罵。其後騰訊起訴指奇虎360不正當競爭，要求賠償400萬元，仲要對方連續3個月道歉。
贏官司當然高興，主席馬化騰親自發電郵畀各大員工，話知道近日CPI及樓價高企影響生活質素，管理層感同身受，為咗令員工「快樂工作、安居樂業」，除咗加薪9%外，仲成立「騰訊安居基金」，提供10億元免息貸款幫員工買樓，只要係首次置業嘅員工就有資格申請。
（余絲韻）