商品投資大師羅傑斯近年對中國經濟及中資股一直情有獨鍾，但因為一個原因，佢話唔想沾手中國銀行股，皆因佢喺○六年到過中國，希望以一個普通客戶身份，親身體驗一下內地嘅銀行服務，但佢竟然發現內地嘅銀行無法為異地帳戶打簿，即係話存戶喺異地攞唔到錢！
羅傑斯嘅言論聽起嚟有啲不可思議，不過絲絲聽老行尊講，內地銀行喺十幾年前尚未有全國帳戶資料聯網呢樣嘢。
隨着內銀近年急起直追，包括工行（01398）、建行（00939）在內嘅全國五大行均可跨境操作，帳戶除咗可以用紅簿仔睇數外，仲可以用銀行卡查數，夠晒方便。之不過喺○六年內地可能真係有小銀行仍未建立全國聯網系統，喺上海存錢嘅帳戶未必可以喺長沙攞錢，所以羅傑斯迄今只持有內地一家小型銀行嘅小量股份。
除咗以「草根調研」考察內銀股外，一向身體力行嘅羅傑斯經常到上市公司考察，佢話調研目的除咗睇吓公司前景，同時可以考察管理層嘅領導能力，當然最好係了解相關行業嘅基本因素有冇改善。
（余絲韻）