髮型可以反映人嘅性格，不過中信大錳（01091）主席邱毅勇剪咗個平頭裝，就係因應工作需要。
絲絲識咗邱毅勇差唔多12年，以前邱總喺中旅國際（00308）母公司香港中旅集團做副總經理，大家冇見一段時間，佢依家由旅遊業轉型做資源業，為咗配合份工，仲連髮型都變埋，真係好專業。
唔單只邱總，中信大錳有好多管理層都與邱總一樣，剪咗個象徵公司嘅「鮑魚擦頭」，邱總話呢個髮型對於喺中信大錳工作嘅人都幾重要，幾乎人人都會剪呢個髮型，何解呢？唔通好似學校嘅校服咁，係身份嘅象徵？邱總話都係o架，事關佢哋經常要親身到錳礦視察及工作，去完巡礦後，成個頭會好污糟，所以人人都剪呢個方便又整潔嘅髮型囉！佢一邊講一邊摸住自己個頭笑得好開心，仲話會一直Keep住呢個造型，咁即係喺中信大錳做得好開心啦！
余絲韻