絲絲講場：龍永圖：齊排隊上廁
博鰲亞洲論壇唔經唔覺已經搞咗10年，最有資格講呢個論壇歷史嘅，當然係龍永圖，佢喺去年先至卸任秘書長呢個位，佢話以前邊有依家咁巴閉，初期嘅論壇會址簡陋，廁所又唔夠，唔理官階有幾高，都要一齊排隊等茅廁。
龍永圖話，博鰲亞洲論壇起步時好困難，開會地方好簡陋，係一個臨時用木搭建嘅建築物。初期佢未做秘書長時，只係其中一個演講嘉賓，令佢印象最深刻嘅，就係去廁所都要花上好長時間，木結構嘅廁所非常少，唔理你係邊度嘅長官，都要齊齊排隊。
後來中遠集團承擔重任，興建咗依家舉行論壇嘅國際會議中心，所以龍永圖經常與中遠集團總裁魏家福以及佢嗰班同事講，話依家博鰲亞洲論壇喺中遠嘅船上開會，東嶼會議中心係一個島，國際會議中心就係一艘大船，魏總可以介紹一下興建國際會議中心嘅經驗。龍永圖、菲律賓前總統拉莫斯、魏總都係元老級人物，三人都喺去年卸任，有人話對於博鰲嚟說，係代表一個時代嘅終結。
余絲韻