絲絲講場：周文耀內地探貧體會深
自從周文耀退任港交所（00388）行政總裁後，絲絲就好少喺公開場合同佢碰面，尋日周文耀就出席咗一個頒獎禮，喺致辭時講笑話好耐冇公開發言，今次要講足半個鐘，希望大家體諒吓喎，大家當然洗耳恭聽啦，期間佢就分享咗一個印象深刻嘅體會。
曾考察山區窮民生活
話說平時官仔骨骨嘅佢，喺去年退休後曾經攀山涉水去到內地嘅偏僻地區，親身考察當地居民嘅生活情況，佢好感慨咁話，想像唔到貧富懸殊嘅差距可以咁大，當地居民要面對冇自來水、自來電嘅窘境，嗰種生活環境與大城市完全唔同。其實一向關心社會嘅周文耀，之前都講過樂於喺慈善團體或專業組織做公職，包括做咗國際培幼會董事會成員。
唔撐ibanker擦記者鞋
講完考察體驗，周文耀又妙論傳媒工作。有記者話投資銀行家工作唔易，所以人工比起做傳媒高出一大截；周文耀就話，佢唔明點解投資銀行家人工咁高就真，反而記者中肯透徹嘅報道，對香港成為國際金融中心好重要。佢咁識講說話，當然引嚟在場傳媒朋友熱烈嘅掌聲喇。
余絲韻