市場熱線：中交建穩步上揚

尋日公布嘅三月新增貸款6,794億人仔，M2增16.6%，都稍高過孖屐預期。今日祖國公布通脹等數據，大家已預咗CPI「超五」，但亦要睇埋PPI，一早有消息話今日順手加埋存款準備金率，但又有人話適逢博鰲開會唔想掃興，總之今年存款準備金率加到23%走唔甩，而且兩個月會加息一次，樣樣唔准加價始終係扭曲市場行為。

黃金周概念仍當炒

雖然尋日大市下跌，但二三線股表現唔錯，好多股創52周新高或者升破位，較標青係零售同內房股，依家祖國五一得三日假，但零售股要炒就唔使理黃金周係大定小，連專做個人遊旅客嘅麗悅酒店（02266）都升8.2%，近日傳得好勁祖國會將個人免稅額由2,000蚊人仔提高到3,000人仔（每月計），而且會喺下個月嘅人大常委會通過，釋放出來嘅購買力會係過千億。至於電器股則由海信科龍（00921）發盈喜所帶動，今年電器售價可能受限價令影響，但鋼材成本並冇太大上落，不過冷氣機原材料嘅銅則貴得好犀利，所以唔同家電有唔同估計。

個別內房股亦無懼房貸收緊，恒大（03333）升近一成，老古上月二十一日推介時僅3.63元，依家累計獲利逾50%，真係估佢唔到。另外，玻璃股亦有炒作，洛玻（01108）同中玻（03300）分別升9%同6.7%，前者係13年新高。弱勢股仍係航運股，前日升咗一日已冇影，飛機股則升兩日後回軟，瑞信話中遠（01919）今年首季可能見紅，如果波羅的海指數仲係1,300點附近，全年計甚至要蝕本。航運股衰在呢兩年太多新船落水，相反會益咗碼頭股，「一舊一舊」唔掂，佢個仔「貓貓狗狗」（01199）尋日卻升4.7%。

尋日另一類集體上升嘅係基建股，但一、兩個巴仙嘅升幅唔多起眼，幾隻基建股走勢好唔同，「兩鐵」（00390及01186）之前跌到殘，皆因話首季定單同毛利率「雙跌」，中冶（01618）一路喺3至3.5元低位浮沉，中交建（01800）則喺高位徘徊，自從派成績表後衝上7蚊樓上之後就高位不退，仲有個小型上升軌推高股價。

重見8字頭應唔難

點解大家都做基建，中交建會一枝獨秀呢？由最弱變最強梗會有個觸發點，鐵路部高官被捕係其一，「兩鐵」嘅鐵路概念變成風險，中交建嘅估值一向係最低，依家往績PE仍係單位數字。中交建嘅強項係路橋建設，香港嘅基建工程亦好多交由佢做，而旗下做工程機械嘅振華重工舊年見紅，但呢個行業今年似乎幾好景，有機會轉虧為盈。中交建一沉三年幾，○七年見過25蚊，一○年二月之後未見過8字頭，忍咗咁多年，爆發力唔係人咁品，重見8字應該唔難。

戰報

金鷹商貿（03308）+22%

小尾上周三睇中嘅金鷹持續做好，昨高見22.55元，以推介日低位18.46元計，最多賺逾22%。

福邦控股（01041）+19%

高仁周三推介嘅福邦尋日逆市呈強，高見0.037元，較推介日低位0.031元，升逾19%。

古勝