市場熱線：中遠國際買得安心

依家唔炒股，執輸行頭慘過敗家。不過，古勝較為擔心油價，紐約油價已升穿每桶113美金，好多專家話到120美金全球經濟就有麻煩，呢排魚缸對祖國加息、日本地震、歐豬危機同利比亞內戰等消息都定過抬油，但油價始終影響實體經濟，如果油價真係升到接近120美金嘅話，古勝亦會減吓磅。

滬綜上升空間大

美金跌到冇眼睇，歐元見1.4482，澳元1.0567，揸住港紙諗住復活節去旅行都會覺得肉赤，下個月實施最低工資唔使問又會樣樣加價，超人隻滙賢人仔REIT（87001）今日招股肯定熱爆燈，阿爺早排仲減香港人仔存款利率幫埋超人造勢，老實講4厘息只係普普通通，北上做人仔一年定存都有3厘幾，但人仔投資選擇唔多，最開心係以極低息發人仔債券嘅公司。

滬綜指升穿3,000點呢個阻力位之後，開始直路望空，睇落A股嘅上升空間會大過港股。美股今個禮拜開始係放榜期，又係「美女」打頭陣，老美企業成績表攞高分已經預咗，道指有冇力再上其實最主要睇QE3。禮拜五祖國公布通脹等經濟數據，已事先張揚三月通脹破頂，息口亦已經加咗，反而冇乜壓力。

聯通（00762）上周五急升6.5%，老古上月尾叫趁業績低吸並冇老點，亦反映「哎瘋4」嘅威力有幾大。上周五最勁係百貨股，聽講頭一季嘅銷售數據唔錯，遲吓祖國提高個人免稅額又可部署炒多浸。

老古上個月叫買中國燃氣（00384），皆因都係覺得佢嘅股權複雜隨時有爭奪戰，估唔到愈傳愈犀利，上周五傳埋中石油（00857）同昆能（00135）爭埋一份。在下都覺得中資會搶贏，但心目中嘅真命天子係中石化（00386），話晒已經係股東。老古雖然已獲利沽咗中燃，冇得繼續分享佢嘅升勢，但愛股昆能亦得益。

中遠國際（00517）派完成績表之後，一直喺5蚊邊浮沉，上周五稍有突破升到5.14元收市，隻股勝在穩穩陣陣，每股有4.2元現金包底（未扣將派特別股息0.35元），扣埋現金後其餘業務真係抵到爛。公司已話咗今年會用30億銀向阿媽買船舶燃料供應業務，但孖屐冇乜耐性，見佢派息唔算高，所以業績後股價不升反跌。

收購具協同效益

不過，對於中長線股友來講，呢次正好係低吸良機，船舶燃料供應業務可以同公司現有嘅船舶燃料貿易業務相輔相成，佢嘅收購對象中國船舶燃料由中遠集團同中石油各揸一半股權，主要向中遠系內姊妺提供燃油，舊年收入超過400億元，利潤有約5億元，收益應該幾穩定。

中遠國際就算唔計賣遠地（03377）嗰筆亦賺2.87億元，增長18%，最大收益來源仍係船舶及集裝箱塗料生產及銷售業務，今年仍係交船高峰期，可以保持增長勢頭。

戰報

昆侖能源（00135）+13%

昆能上周五創13.86元新高，小尾於三月三十一日已推介，於當日低位12.2元上車，賺逾13%。

I.T（00999）+12%

桃桃上周三推介隻I.T，當日低位5.8元，上周五已炒上高位6.5元，短線食胡都賺超過12%。

古勝