絲絲講場:劉艷玲:「魚缸」要擺跑步機

港股延長交易時間已開始咗一排,但市場反應似乎仍然係非議者眾。查實做得經紀,如果時間與「柯打」成正比,當然係愈長愈好啦,但依家嘅情況係生意冇多到,但時間就長咗,連食飯時間都扣埋,你都咪話唔慘。長此下去,經紀們不但搞到胃病纏身,更隨時因為坐得太耐,搞到「椎間盤骨凸出」,咁就真係「大吉利是」。

延時交易經紀捱壞

坐到椎間盤骨凸出,可能係有啲誇張,但尋日絲絲碰見敦沛期貨董事總經理劉艷玲,同佢講起呢件事,佢都覺得公司啲經紀同事真係幾慘,話依家交易時間延長咗,啲同事嘅食飯時間又少咗,搞到佢哋食飯要「趕頭趕命」,話隨時遲啲要幫同事「團購」飯盒。

劉艷玲仲話,驚啲同事太長時間坐喺個「芒」面前,缺乏運動,遲啲可能要擺部跑步機喺公司,等同事冇咁忙時,可以偷閒運動吓。雖然絲絲聽得出佢只係講吓笑,但管理層咁肯為同事着想,都係一件好事。

余絲韻

跨媒體地產網新居入伙 幾萬個精選樓盤 歡迎睇樓!

Money18免費即秒股票報價網站現推出8升級功能,財經資訊,實時實發!