相信冇投資者會鍾意「坐艇」，但如果長揸時所收嘅紅股利息賺到成倍，咁呢項投資仍然係你贏。講緊嘅唔係港股，而係「台灣股王」HTC，佢哋嘅市值已經超越RIM，依家仲多過諾基亞，高達335億美元。
台灣「股王」去年執位，如日方中嘅HTC股價由800元（新台幣‧下同）水平一直飆升，最後衝破「千元」大關，重奪失落已久嘅「股王」寶座。呢兩日HTC試圖挑戰歷史高位1,220元，睇嚟好快可以寫下台股史上，「千元股王」二度刷新紀錄嘅首例。
1,220元呢個價位已經係5年前嘅事，如果喺當年入貨，呢幾年未必唔開心。事關喺呢段期間，HTC總共4次送紅股派息，合計回報率高達96%，就算未沽都已經賺咗嘞。
呢5年HTC嘅市值升咗30幾倍，但依家「股王」呢個地位比以前仲架勢，皆因RIM與諾基亞都係佢哋嘅手下敗將。HTC董事長王雪紅話，阿媽嘅教誨係「忍耐」，凡事唔好只睇眼前，要睇遠啲。咦？呢句話都幾啱HTC嘅小股東喎。
余絲韻