曾經係網通話事人嘅中移（00941）前副董事長張春江，由於涉及嚴重經濟及違紀而遭中紀委調查，喺去年一月七日被免職，絲絲尋日睇到中移最新發出嘅年報，發現作為大紅籌嘅中移，做事都相當均真。何解？因為張春江去年做咗7日董事嘅人工，中移都有計番畀佢。
呢7日董事嘅人工，為數合共22,000元。條數係咁計嘅：3,000元董事袍金、16,000元薪金與津貼以及3,000元退休計劃供款，因為只做咗7日，工作表現花紅就梗係冇啦。參考張春江喺○九年唔計工作表現花紅共獲150.7萬元人工，佢去年所獲嘅「周薪」都可算係按工作日數嘅比例嚟支付，中移咁做都可算係夠晒公道。
絲絲話中移夠均真，唔係單靠一個Case就咁樣講，中移嘅非執董Nicholas Jonathan READ亦係做唔夠一年就辭職，中移都按比例計番袍金畀佢，以「日薪」計，同前一年差唔多。
至於其他執董好似王建宙、魯向東及薛濤海等，袍金加埋其他收入，與○九年一模一樣，只有李躍因退休計劃供款稍為高過○九年，所以總收入有6%增幅。
余絲韻