市場熱線：中信泰富水漲船高

兗煤（01171）尋日升4%再創新高，近排升勢好似坐火箭咁，但煤股得佢咁生猛。滬綜指微升6點，但企穩喺3,000點樓上係好兆頭，尋日高位又同上次一樣係3,012點，保守說法係仲未破位。

風電表現遜太陽能

隻經緯紡機（00350）好離譜，佢隻A股喺下晝一點開市前拉閘，話有重要嘢公布，仲講明對股價可能會產生較大影響，但H股照常買賣，所以炒家湧晒去炒H股，結果炒高18%之後喺兩點49分亦都拉埋閘。公司夜晚在深交所發通告，預計首季多賺10倍，計落今年PE會得單位數字，隻股復牌相信仲有提升。

風電炒完一輪已謝晒，中傳動（00658）同金風（02208）差唔多打回原形，太陽能股雖然亦回軟，但相對硬淨好多，卡姆丹克（00712）更加話有名牌打算入股。古勝對風電股已逐漸死心，太陽能股反而可以逢低吸納，今年成績表肯定靚靚。

葡萄牙終於低頭向歐盟求助，葡股尤其錢莊股即時上升，好多投資者一早對呢隻牙冇乜興趣，皆因過程同結果早係預計之內，依家孖屐氣氛咁好，「歐豬」問題可以暫時丟埋一邊。

尋日升得最勁嘅藍籌係中信泰富（00267），呢隻又係孭債高類別，但隻股食粥食飯睇鐵礦石，依家無疑債務纏身，不過當澳洲鐵礦石投產之後會一天都光晒，另一減債方法係繼續賣非核心資產。

中信泰富近日升勢當然離唔開澳洲紙，澳元尋日已升到1.0482，有早知冇乞兒，想當日榮太子唔使落台，仲可以贏大鑊添！不過，澳元升值反映公司嘅資產有價，佢嘅袋鼠國鐵礦石項目會喺今年試產，最終目標係每年生產2,000萬噸。

澳洲鐵礦價值提升

中信泰富喺上月初派成績表之後，大行都話鐵礦石項目係公司未來嘅關鍵，大、細摩分別睇21蚊同20蚊，較樂觀嘅高盛亦只係睇25.8元，以尋日收市價24.1元計已差唔多到價，但大行上個月嘅預測係未計澳元升值因素。

其實就算係大行，對中信呢個項目嘅盈利能力亦只係斷估，因為採礦最緊要睇產品售價同開採成本，大藍籌尚且話唔夠透明度，細價股喺山卡拉地方買咗個礦返嚟然後大吹大擂更加信唔過。

公司管理層對澳洲鐵礦值幾多肯定最清楚，呢排嘅升勢斷估唔係亂炒一通，到資產重估入帳時應會有驚喜。隻股升親唔係人咁品，舊年由五月升到十一月，累計升幅達86%，今次冇咁誇張，但搭轉順風車有心未怕遲。

戰報

陽光能源（00757）+30%

陽光能源尋日一度高見2.45元，古晨於上周二推介當日，其低位為1.88元，短短幾日累積升幅已逾三成。

浪潮國際（00596）+21%

浪潮國際股價持續向上，尋日高見0.63元，股博士周三已經推介畀大家，當日低位係0.52元，最多賺逾21%。

古勝