對於上市公司投資體育事業，好多人都有唔同嘅睇法，好似恒大地產（03333）咁，以億計資金投入搞足球，有人認為佢哋有啲偏離咗地產本業。不過老闆許家印就有另一種態度，佢認為投資喺足球除咗係對體育事業嘅探討，亦可以幫到公司做到品牌嘅宣傳效果，真係一舉兩得！
許家印話，做廣告一分鐘已經要花費幾萬蚊，至於搞足球，球員都着住寫有「恒大」嘅球衫，加上幾十家電台同時轉播，一播仲要播成兩粒鐘，以恒大呢家一年做幾百億元銷售嘅公司計，投入幾億元就可令公司知名度提高，又對銷售有利，其實都幾抵！對於外面有傳許家印仲投資埋礦產，佢就話自己都係第一次聽到有咁嘅傳聞。
驚唔驚呢啲傳聞會影響公司股價？佢又滿唔滿意依家嘅股價表現？許家印就笑住話「一刻都未有滿意過！」佢話公司嘅營運表現咁好，可以計到依家個PE（市盈率）係幾多啦，所以冇可能滿意喎！
余絲韻