發生地震及核輻射災難後，日本一片愁雲慘霧，唔少生產線被迫停產，睇新聞見到，大企業派駐日本嘅海外員工好多都選擇離開，留低工作嘅日本人或外國人都好似被人遺棄咁，士氣自然低落。不過，有幾家跨國企業嘅老闆就非常識做，專登由美國飛去日本慰問員工，為佢哋加油！
呢班大老闆分別有摩根大通行政總裁戴蒙（Jamie Dimon）、可口可樂行政總裁穆泰康（Muhtar Kent）及美銀行政總裁莫伊尼漢（Brian Moynihan）。
據講摩通嘅戴蒙喺上周喺日本嘅探訪活動，特意為日本地震嘅死難者舉行默哀儀式，並帶嚟其他員工嘅口訊，話全球嘅摩通同事都思念日本。呢班大老闆嘅行動除咗鼓勵士氣，仲打破以往美國公司予人制度化、缺乏人情味嘅形象，值得一讚。
另外，風險研究公司AIR Worldwide最近修訂咗日本9級地震及海嘯引致嘅預計保險賠償額，由原先估計嘅150億至350億美元，收窄至200億至300億美元（約1,550億至2,325億港元）。
余絲韻