美聯集團（01200）近期有唔少人事變動，早兩個禮拜，執行董事郭應龍轉任集團中國部聯席行政總裁，尋日又將副主席鄧美梨個位一拆二，佢嘅愛女黃靜怡以及美聯台柱之一嘅黃錦康齊齊升任副主席，鄧美梨就退下火線，只做執董。
黃靜怡係美聯主席黃建業及鄧美梨嘅愛女，今年30歲，喺○八年三月加入美聯做執行董事，估唔到咁快就再「升呢」。至於黃錦康，佢一直係美聯嘅高級執行董事。點解升佢兩位？美聯話主要係兩人共同領導嘅主席辦公室自○八年成立以來，喺好多重大決策上都有舉足輕重嘅貢獻，就算期內經歷市況大幅波動，都可以先發制人，搶盡市場，對集團嘅發展功不可沒。
黃錦康話，佢過去10年都一直睇住代理行業嘅質素提升，會奉行先了解後投資嘅取態，仍然會繼續教育市場及市民點樣可以準確睇市。
余絲韻
