絲絲講場：思佰益CEO主持推介 北尾吉孝大有來頭
日本雖然經歷地震及核災，但無損日本企業進軍海外，首家喺本港上市嘅日本企業思佰益（SBI）尋日舉行投資者推介會，公司唔少高級管理層都飛嚟香港坐鎮，包括5歲開始就學習《論語》嘅行政總裁北尾吉孝。
今年60歲嘅北尾吉孝來頭唔小，喺日本金融界好有江湖地位，佢過去曾出版唔少著作，講解管理經驗及經營手法等，尋日每名出席推介會嘅參加者亦有份獲得佢嘅著作，包括中文及英文版；即係話，除咗厚疊疊嘅初步招股文件外，出席嘅「芬佬」仲可以輕鬆一下，刨吓佢嘅大作呢！
5歲起學習《論語》
北尾吉孝出身名牌大學，七八年喺英國劍橋大學基督學院取得文學士學位，所以佢講英語好流利。佢對中國亦有認識喎，話說佢自細受儒家文化背景薰陶，5歲起即開始學習《論語》，一直好推崇中國聖賢先哲嘅教誨。
金利豐老闆朱太及朱生尋日亦有畀面出席推介會，原來金利豐係思佰益今次上市嘅聯席經辦人之一，兩家公司都係做金融，唔知未來會唔會有合作呢？大家不妨拭目以待。
余絲韻