全球最大社交網站Facebook（fb）估值愈嚟愈高，最新數字係超過600億美元，一旦上市，或會成為歷來最大規模嘅IPO，唔怪得一直成為大眾焦點，監管機構更對佢哋嘅一舉一動𥄫到實。有報道話Facebook有意聘請白宮前新聞秘書吉布斯，作為佢哋明年IPO嘅軍師。
呢個消息係嚟自《紐約時報》，報道話吉布斯會負責與傳媒、投資者、官方溝通及發布訊息。有知情人士話，由於雙方嘅磋商仍處起步階段，故未有正式聘書，甚至有機會告吹。
據悉吉布斯喺二月份離任白宮新聞秘書一職，計劃喺轉職私人企業前，率先協助總統奧巴馬喺下一次總統大選中競逐連任。不過，Facebook正極力游說佢加入公司，雖然雙方未有討論薪酬詳情，但估計吉布斯嘅薪酬將高達數百萬美元。
余絲韻