新任國美電器（00493）主席張大中係咪一個過渡人物，好自然要睇佢與最大股東黃光裕嘅關係，佢尋日畀人追問呢個問題，竟然用「我們彼此有仰慕之情」嚟形容，仲以「光裕」嚟稱呼黃光裕。
張大中好坦然咁話，佢比起黃光裕早5年加入家電行業，大家都喺北京起家，有一段相當長嘅時間係競爭對手，喺競爭之中相互都曾得益，彼此亦有仰慕之情，佢仲話佢喺行內都幾有人緣，與黃光裕嘅關係當然亦好，不過就強調佢哋冇乜「特殊嘅私人關係」。
不過幾有趣嘅係，國美總裁王俊洲曾經係大中電器嘅總經理，外界傳聞話佢與張大中唔多啱key，所以先過檔國美。張大中尋日亦提及，話國美有好多人佢都好熟，包括王俊洲，仲講笑話「王俊洲始終走唔出如來佛嘅手，做番我手下」。
有人問張大中空降國美係受邊個邀請，坐喺佢隔籬嘅第二大股東貝恩投資代表竺稼即刻搶住護航，話張大中與國美有好深淵源，國美旗下好多店舖都叫大中電器，所以國美董事會邀佢出山係好合理，叫大家唔好作太多無謂猜測。至於張大中會唔會只係一個過渡？佢就話咁要睇吓佢喺國美時期嘅業績喇，而國美暫時唔會再有人事變動喎。
余絲韻