建行（00939）派完成績表，絲絲好關心佢哋嘅高層薪酬係咪與中行（03988）一樣，即係銀行業績年年升，管理層就年年減人工。建行董事長郭樹清話佢哋嘅企業文化好好，歸屬感及效忠度好高，所以一眾管理層連續3年減人工，但係一個都冇離開。
近年歐美國家嘅金融機構，即使業績好咗，加少少人工都畀股東嘈到拆天。絲絲覺得內銀嘅高層減人工，表面上好似對佢哋好刻薄，實情有另一個好處，就係慳番好多時間處理股東嘅投訴，專心幫銀行提高回報好過喇。
不過郭總都話，薪酬及花紅係一個好複雜嘅問題，畀得多會惹人質疑，畀得少就令人才流失，至於建行一眾管理層收幾多？佢話要等下次開完董事會先會披露，好快啫，下月就揭曉。
郭樹清尋日嚟咗香港見傳媒，猛讚香港傳媒寫業績好叻，唔單止睇財務報表時，詳盡報道佢哋嘅數據，連財務報表冇嘅數都自己計埋。佢又讚傳媒揀相都好一流，出佢嘅相張張都好好睇，好謙咁話自己實情冇咁靚仔，即係話，佢尋日已睇晒所有關於建行業績嘅報道啦！
余絲韻