市場熱線：興業創新高無難度

近日嘅孖屐焦點不離電力同業績，上周末過百間公司派成績表，每間睇幾分鐘已成個周末唔得閒，雖然多數仍係見光死，但個別如飛克（01998）、星辰（01155）、天能（00819）同重汽（03808）等死唔晒。有部分的確沽得幾慘情，利豐（00494）兩日唔見一成、高位唔見三成，但古勝覺得大行嘅報告好多餘，利豐舊年因泊住沃爾瑪呢個大碼頭而炒起，但沃爾瑪一向以「鍊價」出名，一早應知毛利率唔慌高啦！

新舊能源股見高低

另一類比較差嘅係燃氣股，主要亦係新奧（02688）業績唔好所拖累，中國燃氣（00384）同北控（00392）亦陪跌。依家各樣能源爭櫈仔，核電由領先變落後，煤炭股則掩住半邊嘴笑，尋日較神奇嘅係中國秦發（00866），派完成績表後原本最多跌16%，但收市僅跌5.7%，一○年PE約11倍，睇落絕對唔係咁差。

太陽能股尋日又再升過，皆因中國電力企業聯合會官員建議內陸核電廠放緩建設，除咗保利協鑫（03800）同卡姆丹克（00712）再創新高之外，華基（00155）同興業太陽能（00750）亦都幾靚仔，相反東氣（01072）同上氣（02727）就上氣唔接下氣，分別挫4%同6.5%。

呢次福島搞到咁大劑，對太陽能上游企業肯定最有着數，因為唔單止祖國嘅核電發展會拖慢，全世界都乘機反核，德國有25萬人示威，太陽能就冷手執個熱煎堆，對上游硅片嘅需求亦會上升。至於下游得益會冇咁明顯，但興業太陽能啱啱派嘅成績表亦唔錯，賺多43%至2.16億人仔，計落一○年PE約13倍。

光伏業務急速拓展

興業太陽能如果計收入，傳統幕牆同材料仍佔超過一半，但新業務光伏建築一體化同太陽能產品嘅毛利率高好多，所以應該佔經營溢利嘅大半，亦好彩公司上市後轉型得夠快，否則淨靠傳統幕牆業務就該煨。

今年集團太陽能業務應會繼續快速發展，旗下湖南嘅20兆瓦屋頂太陽能電站舊年尾入選「金太陽示範工程」，今年初已收到通知獲1.34億人仔政府補貼，喺尼日利亞同卡塔爾亦攞到海外定單。集團喺珠海東澳島結合風力、太陽能、柴油燃料發電及儲存能源，成功試運行之後，東澳島嘅再生能源使用比例將提高到70%。

走勢方面，興業已回升到接近7蚊，憑住呢排太陽能股嘅氣勢，破7.31元個52周高位難度唔大，以15倍PE計可見7.87元。

戰報

TSC海洋（00206）+19%

古晨尋日推介TSC海洋即日落鑊，吼中低位2元上車，於高位2.38元食胡，即日賺19%。

慶鈴汽車（01122）+18%

帥哥上周五睇中嘅慶鈴相當強勢，尋日炒上高位2.59元，相較推介日低位2.2元，短炒賺近18%。

古勝