孖妹缸湖遊：技術分析大師授絕藝

華爾街著名技術分析師Louise Yamada係紐約Louise Yamada Technical Research Advisors（LYA）董事總經理，曾於所羅門美邦（現稱花旗集團）任職25年，做過技術分析研究主管。佢出名料事如神，曾準確預測九九至○○年美國熊市來臨以及科網股爆破，估中金市喺○一至○二年踏入新周期性嘅牛市以及中小企喺○二年跑贏大市等，佢喺○一年起仲連續4年被選為華爾街最佳技術分析員。

L：華爾街著名技術分析師Louise Yamada

量度供求 觀察異動

祺祺：你嘅辦公室貼滿圖表，睇得出你係技術分析嘅信徒，你有冇為咗鑽研金融市場走勢而廢寢忘餐？

　L：我通常一日做足12個鐘頭，周末都會抽幾個小時工作，不過我呢排都改變咗寫報告嘅形式，由周報轉為月報。我哋可以用技術分析量度市場供求，從價格觀察到其他人透過資金進行嘅行為，價格具指標性，當中亦蘊藏咗知識。不過要記住，我哋要等候升勢及跌勢確認，所以唔可以靠技術分析喺最低位入市或最高位沽貨。

高妹：有時技術分析指標未明確，就要待方向清晰先決定買賣，減低資金風險。

　L： 呢啲時候寧可唔入市。置身於股市外希望自己有買貨（錯過升浪），好過入咗市後希望自己冇揸貨（被蟹貨綁住，損失本金）。

港股料下試二萬點關

祺祺：你以前喺大公司從事分析工作，要投資唔容易，成立公司後有冇買股票？

　L： 好少，以往有利益衝突。當你遵守沽售規律，技術分析可成為你嘅朋友，可免重大損失，甚或令你賺大錢。股價係低位及高位連續被推高，可確認股份升勢，我哋可以將兩個低位連起畫出上漲趨勢（Uptrend）作將來參考；相反，當價格高位及低位相繼回落，可反映市場供應，我哋可以連起兩個低位畫出跌勢（Downtrend）。

高妹：日本上周五地震震傷港股，恒指一度下跌508點，依家港股處於上升軌抑或下降軌？

　L： 恒指至三月初經歷咗10%整固，企穩22,400點支持位係好重要，一旦跌穿可能會下試20,000點主要支持。

祺祺： 近期利比亞局勢不穩，刺激油價升穿100美元，你估油價仲有冇得升？

　L： 油價喺○四年突破為期24年嘅整固，我哋亦喺嗰時確認新嘅周期性牛市。國際油價自四十年代展開咗為期24年嘅整固期，喺七十年代突破，而○四年油價嘅突破反映類似升勢。油價目標初步上望115美元、125美元，有機會重見145美元。

新興市場有再跌風險

高妹： 黃金及其他貴金屬係咪仍處於牛市？

　L： 黃金喺○二年走入咗一個嶄新嘅周期性牛市，金價與美元持續有相對關係，當美元轉弱時，金價就會上揚，箇中原因係我哋相信美元正處熊市周期，黃金仍處於牛市。喺○六年時，我哋預期美元將來可能喪失作為各國主要外匯儲備嘅地位，黃金目標價係1,500美元，之後料上試2,000美元，相信國際金價會愈升愈高。白銀亦剛啱突破咗30年低位，而從技術分析角度睇，可上望40美元、60美元，甚至更高。

祺祺： 新興市場本年初起持續跑輸畀環球股市，將來會唔會面臨進一步風險？

　L： 技術上，由高位回落最多10%叫做「整固」（Consolidation），跌幅10%至20%係「調整」（Correction），跌幅20%或以上象徵已踏入周期性熊市。如果新興市場再次跌穿近期低位，就繼續會有風險。有啲新興市場喺今年至三月初只係跌咗6%，另外有啲跌幅已達17%。睇番動量模型（Momentum Model），有啲新興市場股市仍維持沽售，顯示有進一步下調風險；超賣訊號顯示沽壓，投資者宜靜待超賣訊號減弱，至少要肯定沽貨潮暫時完結先好入市。

美股新一輪牛市來臨

高妹： 美股成績好標青，係咪繼續有運行？

　L： 可持續升勢，但可能會被東面嘅外圍因素拖累表現，喺依家嘅趨勢可能會先調整10%後再上揚。長線嚟講，美國科技股從7年低位反彈過來，顯示新一輪牛市來臨，雖然部分大型企業表現滯後，但有好多股票由谷底回升，短期內或會持續升勢，將來可能要整固年初至今累積嘅升幅，我哋可嘗試趁機低吸優質企業。

祺祺： 美國金融板塊喺金融海嘯後經歷大跌，好多股票現價較高位仍相差一大截，幾時先有起色？

　L： 升幅名列前茅嘅股票會跌得愈傷，跌幅愈大，就需要愈長時間進行調整。好似科技股自二○○○年科網股爆破後，用咗8年時間修補創傷，相信金融股亦要用數年回復舊貌。呢個板塊相對嘅優勢已逐漸褪色，換句話講係會跑輸大市。

打壓樓市未見效45.7%人估再有辣招

政府打壓樓市措施未見成效，眾多屋苑呎價均創九七年後新高。你認為港府短期內會再推出打壓樓市措施嗎？據今期《東方日報》網上民調截至上周六晚上6時嘅結果顯示，45.7%人認為政府會再出招，其餘54.3%人就認為唔會。

Louise Yamada小檔案

現職：Louise Yamada Technical Research Advisors（LYA）董事總經理

履歷：曾擔任所羅門美邦（現稱花旗集團）技術分析研究主管

學歷：美國瓦薩爾學院學士、銀行街教育學院碩士

威水史：2001年起連續4年被選為華爾街最佳技術分析員

高妹、祺祺

若有料報畀高妹同祺祺或有嘢問，可電郵money.biz@opg.com.hk