市場熱線：福山收益有保證

恒指一跌，又穿返10、50及100日線，但近排呢類移動平均線參考作用極低，升穿下降軌跟住又跌穿上升軌，大戶同你玩心理戰：實則虛之，虛則實之，但就算逆向思維想跌市買貨，個timing都幾難掌握，淨係得22,500點係個明顯底部，但估計今次調整唔會咁深。

零售股宜見好即收

淨係睇祖國嘅幾個二月份經濟數據：出口升得2.4%，PPI漲7.2%創29個月新高，CPI漲4.9%，一至二月社會消費品零售總額增長15.8%。無論你點解讀，心理上或實質上唔驚就假。PPI同CPI咁高，自然又想到加息，而零售總額較舊年底大跌3.3個百分點，仲未計物價上升因素，顯示通脹已危及消費層面，呢排稍為翻生嘅零售股要見好即收。

今年真係大吉利是，澳洲昆士蘭水災，日本同新西蘭地震，世界各地好多雀仔同魚離奇死亡，北非同中東七國咁亂，冇天怒都有人怨，香港政府一鑊泡。其實依家股票估值已經唔低，唔買股票不賭是贏錢，但手痕冇得醫，仲有一句「執輸行頭慘過敗家」，就算跌市都有好多股票上升。

每次天災人禍，魚缸慣例都係先跌後升。鋼鐵股上周五尾市發日本國難財，其實好似冇乜關係，而且中國啱啱公布鋼鐵庫存破咗紀錄。日本因為驚地震，所以好多屋都係用木造，炒重建概念應係木材股受惠，三林（03938）其中一個主要孖屐喺日本，所以隻股下晝即升4.8%。

發災難財除咗三林之外，年初昆士蘭水災令焦煤出口受阻，今年第二季嘅焦煤合同價升到每噸330美金嘅歷史新高，環比上漲30%以上，同比更加大升50%，國際煤價升亦會帶動內地煤價跟住升，所以福山能源（00639）喺上月25日突然抽升15%，跟住股價並冇明顯回落，營造一個旗形走勢，上周五亦逆市升1%。

焦煤期貨年內推出

另一方面，大連商品交易所今年將會推出焦煤期貨，可以為焦煤商同鋼鐵商提供避險功能，內地焦煤價格有機會追貼國際價。仲有就係，國家能源局話會研究方案，將焦煤等稀缺性煤炭品種實施保護性開發。而未來5年起3,600萬套保障房要用幾多噸鋼鐵亦相當襟計，因此福山突然跑出並非乾炒咁簡單。

福山係全國第二大嘅硬煉焦煤企業，年產量達600萬噸，老古上月中亦曾推介，如果能突破旗形，應該有機會挑戰52周高位6.45元，呢排咁多好消息配合，值博率都幾高。

戰報

先思行（00595）+13%

古晨上周三吼中隻先思行表現強勢，周五一度飆上1.62元高位，跟到足可賺超過13%。

易寶（08086）+24%

桃桃上周四話易寶有力再上，果然周五升至1.51元高位，於當日低位1.22元上車，勁賺近24%。

古勝